نتفق في البداية إن من حق كل واحد يتكلم و يقول اللي هو عايزة من غير تجريح أو خروج عن الآداب العامة ... اتفقنا ؟؟ أوك ... ننتقل بقى لموضوعنا ... د.أيمن نور ... أنا فكرت أتكلم عنه اكتر من مرة و تابعته يمكن من أول قضية التزوير لتوكيلات حزب الغد ... لكن المشكلة اللي خلتني ارجع أتكلم عنه هي تصريح ليه في الصحف من كام يوم ...
هنيجي للتصريح في وقته ...
مفيش جدال أن أيمن نور – مع حفظ الألقاب طبعا – هو حالة سياسية جديدة على وقتنا المعاصر ... لو فتحت الأرشيف بتاع أي جريدة و بحثت عن أيمن نور هتلاقي كم مقالات و أخبار عنه بالآلاف ... يمكن لأنه ما بيقدرش يستحمل أن تعدي فترة طويلة من غير ما يصدر تصريحات معظمها مثيرة للجدل يرجع بيها للضوء...أيمن نور في البداية ليه تاريخ طويل جداً و سيرته الذاتية دسمة بالإنجازات اللي هعرضها في المشاركة الجاية.. لكن أيمن نور ما ينفعش ما نعترفش انه أخطأ في قضية توكيلات حزب الغد .. و الخطأ هنا مش بنقول انه من ناحية الحكومة .. أو أيمن نور أتحكم عليه في محاكمة عسكرية ... لأ الحكم صدر من القضاء المدني ... و لا يجوز التعليق على أحكام القضاء المصري اللي لا يختلف أتنين على نزاهته ... حتى لو كان واحد من الاتنين دول هو ايمن نور نفسه...
أيمن نور تقريبا ما بطلش تصريحات من ساعة إعلانه الترشح لرئاسة الجمهورية لحد وقتنا الحالي، و يمكن البعض بيشوف انه كان بيتعمد إثارة المشاكل ...
و لو درسنا تصريحات أيمن نور في الصحف هنلاقي العجايب الحقيقية ...
بدأ أيمن نور يصور للعالم كله أن قضيته سياسية اكتر منها جنائية ... و أن الموضوع ده تم تلفيقه ليه من ساعة ما أعلن عن نيته للترشح لرئاسة الجمهورية ... و الغريب أن أيمن نور كان أتحبس بسبب القضية دي في يناير و خلال فترة السجن كان الرئيس مبارك أعلن عن نيته تعديل المادة 76 من الدستور المصري في مارس و قبل خروج أيمن نور من السجن بـ3أيام كان أول عدد لجريدة الغد المنشت الرئيسي فيه هو ترشح نور لرئاسة الجمهورية ... أيمن نور خلال السجن ما بطلش موجة التصريحات و كذلك فيض المقالات اللي كانت بتنشرها جريدة الدستور ...
طبعا أيمن نور كان أول حاجة في جدول أعمال أي وفد أجنبي لمصر ... و كانت الضغوط بتتزايد يوم بعد يوم للإفراج عنه ... في تدخل صريح في الشأن الداخلي المصري ...
بعد خروجه من السجن بسبب الإفراج الصحي بدأ أيمن نور معركة جديدة مع الصحافة بسبب الأخبار اللي اتنشرت عن انفصاله عن زوجته جميلة إسماعيل .. و خاصة مع المصري اليوم ... و نور فضل في كل جرنان و محطة يكذب و ينفي ... و يهاجم الجرنان ... لحد ما في الآخر طلع كل اللي أتقال صح ..
و على الرغم من أن البعض حاول يروج لأن الموضوع شخصي بحت و لا يجوز التدخل فيه بأي شكل من الأشكال ... إلا أن اللي حاولوا يروجوا لكده باعتبار إن الحملة ضد حياة نور الشخصية بإيعاز من جهات عليا في الدولة .. كان الرد عليهم سهل و خاصة إن الجرايد اللي بتتكلم دي مليانة بألاف الأخبار اللي بتتدخل في حياة الناس الشخصية ... خاصة الشخصيات العامة سواءا كانت شخصية سياسية أو فنية أو رياضية أو. .. أو ... و خرج نور في النهاية بصورة الكاذب ... لأن كل اللي أتنشر في الصحف كان حقيقة... بتأكيدات جميلة إسماعيل نفسها ...
الغريب إن نور اللي بيحارب التوريث حتى وقتنا الحالي ... نائب رئيس حزب الغد هي جميلة إسماعيل ... مراته ... لينضم حزب الغد لمجموعة الأحزاب العائلية اللي بتضم الحزب الوطني و حزب الجبهة الوطنية الديموقراطية و حزب الأمة ...
أيمن نور بمجرد خروجه من السجن و في سعي للترشح لانتخابات الرئاسة الجاية ... و لأني ضعيف في الناحية القانونية مقدرش أقول يقدر و لا لأ مع ثبوت حكم التزوير في حقه ... إلا أنه بدأ حملة طرق الأبواب في كل المحافظات ...
أول مصادمة لنور كانت مع الكنيسة في ادعاءه زيارة 3 كنائس بالفيوم و ترحيبهم بيه ... الخبر اللي اتنفي تماما من قبل الكنيسة في مصر !!!! و تم تكذيبه تماما ... بل الكنيسة قالت على لسان مطران محافظة الفيوم إن أيمن نور أتصور قدام باب الكنيسة و نشر الصور على انه زار التلات كنائس !!!تاني مشكلة هي دعوة البرلمان الأوروبي لأيمن نور كناشط سياسي و أيمن نور من داخل البرلمان الأوروبي قال أن الوضع السياسي في مصر سيء و الوضع الاقتصادي خانق و اتهم السلطات المصرية بـتشويه سمعة البلاد عن طريق الانتهاكات الصارخة التي ترتكبها تجاه حقوق الإنسان ومخالفة الشرائع والمواثيق الدولية!!
الغريب أن ايمن نور باعتبار البعض ليه وطني مصري من الدرجة الأولى مش من المفروض أن يسيء لسمعة البلد بالخارج ... نحل دايما مشاكلنا في الداخل ... زى ما قال مرة النائب مصطفى بكري ... إن شاء الله الحكومة تولع فينا بس محدش من بره ليه دعوة ...
الواقعة المضحكة قوي، هي رغبة نور في زراعة 200 شعرة صناعية، فالبعض بيسخر من أن الرئيس مبارك بيصبغ شعرة و دي حرية شخصية .. أيمن نور برضوا بيستغل حريته في زراعة 200 شعرة صناعي على الرغم من أن الحد الأدنى زى ما قالت ليه الطبيبة في المستشفي هو 1000شعره ...المشكلة مش في الحرية الشخصية على الإطلاق هنا .. لأني برضوا مع انه لو عايز يزرع شعر كامل فده حريته الشخصية .. المشكلة أن أيمن نور خاف الموضوع يوصل في الصحافة فراح بعديها يعمل محضر في القسم بيقول أن شعره وقع نتيجة مادة حارقة رماها حد علي شعره و وشه ... على الرغم من انه قال للطبيبة إن سقوط الشعر كان بسبب السيشوار و أن الراجل اللي كان معاه كان الكوافير بتاعه!!!!كل وقائع دي و اكتر بتشير أن أيمن نور – في رأيي – عجبته الهالة السياسية و الاهتمام الإعلامي اللي حظي بيه ...
و ده بيبان مع رغبته في افتعال المشاكل مع خصومه السياسيين ... فبعد ما نشر عن استطلاع رأي أن أيمن نور تفوق على جمال مبارك في سؤال عن مين فيهم هيكسب الانتخابات الجاية ... خرج أيمن نور بعد الاستطلاع يهاجم جمال مبارك و يشير إلى انه ظاهرة مصطنعة !!!! و كان من المنطقي أن أمين الشباب بالحزب الوطني ينصح نور بالذهاب لطبيب نفسي ...
و أيمن نور في وقفة احتجاجية بإسكندرية صرح برضوا إن جمال مبارك هو أكبر مشكلة تواجه مصر!!! .. و دي طريقة لا تليق بسياسي في مهاجمة خصمه ...
الموقف المثير للسخرية، أن أيمن نور كان عايز يبات في فندق في كفر الشيخ ... الفندق رفض لسبب بسيط إن أيمن نور ما كنش معاه بطاقة رقم قومي ... رد الفعل الغريب كان أن أيمن نور بدأ اعتصام في الفندق اعتراضا على رفض بياته بحجة تلقي الفندق لتعليمات أمنية عليا، و بعد كده توجه للمحافظ و مدير الأمن علشان يسجل اعتراضه!!!! ... وكأن ترشحه لانتخابات الرئاسة مرة حاجة كافية انه ما يشلش بطاقة !!أيمن نور كان حضر لقاء للدكتور أحمد زويل في مكتبة الإسكندرية ... أيمن نور قام يسأل زويل سؤال ... " إيه اللي تقدر تقدمه لمصر ؟؟؟ " ... مش من عادتي اسخر من الآخرين .. بس شخص المفترض انه كان من المحتمل يبقى رئيس جمهورية مصر العربية يسأل سؤال بديهي أكيد أتجاوب عليه خلال الندوة أو أتجاوب عليه 100 مرة قبل كده !!! و القاعدة اللي دايما كان بيتعلمها الشباب في الجامعة ... ما تسألش سؤال أتسأل قبل كده .. و لا تسأل سؤال أنت عارف اجابته ... أيمن نوربس سأل علشان تخرج الصحف في اليوم التالي ... زويل رداً على نور ... كذا كذا كذا كذا .. " و ده اللي حصل بالفعل !
آخر واقعة هتكلم فيها هي تصريحات لنور بعد ندوة مكتبة الاسكندرية ... و هي كما ذكرت في الجرنان:
وردا على سؤال حول سبب رفضه السفر إلى الولايات المتحدة الأمريكية، رغم تحديد الزيارة، قال نور إنه رفض السفر لوجود الرئيس مبارك هناك «فهو رئيسنا مهما اختلفنا معه وأنه ذهب بصفته رئيسًا للجمهورية أما أنا بصفتى ناشط سياسى ومعارض». وأشار إلى أنه لن يذهب إلى أمريكا حتى يعود الرئيس مبارك من زيارته المرتقبة إلى واشنطن حتى لو تطلب الأمر تأجيل زيارته لأوباما حتى يناير المقبل أو إلغاءها بالمرة و«يبقى ربنا هو اللى أراد هذا وريحنى من مشقة السفر ١٤ ساعة إلى أمريكا».
|
و السؤال اللي بيطرح نفسه ... أي المبرر لزيارة نور أو أي معارض سياسي لدولة زى أمريكا أو أي دولة من دول الاتحاد الأوروبي ... هل لازم نطالب دايما بتدخل الغرب في شئونا الداخلية ... هل فيه سبب تاني للزيارة غير الحديث عن الأوضاع السياسية و الاقتصادية لمصر ؟؟؟
الموضوع كله مطروح للنقاش تحت عنوان واحد ... و أرجو اللي يرد يرد من غير تجريح في شخص أيمن نور .. أو معتقد إن الموضوع لمهاجمة أيمن نور ....
يا ريت نرد بموضوعية عن السؤال ده ....